Lëvizja Vetëvendosje(LVV), të dielën po mban mbledhjen e 57-të të Këshillit të Përgjithshëm.
Kjo mbledhje është duke u drejtuar nga Hydajet Hyseni–Kaloshi.
Hyseni në fillim të kësaj mbledhjeje ka kërkuar nga të gjithë delegatët që të mbajnë një minutë heshtje në nderim të ish-presidentit të Shqipërisë, Bujar Nishani, i cili ka ndërruar jetë të shtunën e 28 majit.
Në këtë mbledhje po merr pjesë edhe kryetari i kësaj partie, njëherësh kryeministri i Kosovës, Albin Kurti.
Gjatë fjalës së tij para anëtarëve të Këshillit, Kurti ka thënë se tash imazhi i Kosovës ka një përmbajtje më të re si në kuptimin politik ashtu edhe ekonomik.
Ai ka përmendur aplikimin e Kosovës për anëtarësim në Këshillin e Evropës,(KiE) duke shtuar se janë duke i bërë përgatitjet për aplikim edhe në Aleancën Veri Atlantike(NATO) dhe Bashkim Evropian(BE).
“Kemi aplikuar për anëtarësim në Këshillin e Evropës. Anëtarësimi ynë në KiE është vlerë e shtuar për Këshillin dhe mundësi për Kosovën që të përparojë më shumë në fushën e drejtësisë. Jemi duke i bërë përgatitjet për aplikim për anëtarësim në Partneritetin e Paqes në kuadër të NATO-s, e do të aplikojmë edhe për anëtarësim në BE”, ka thënë Kurti.
Kryeministri ka theksuar se një vit i qeverisjes ka qenë mjaft sfidues, duke përmendur pandeminë, krizën energjetike, agresionin rus në Ukrainë e shumë çështje tjera.
Kurti ka shtuar se gjatë këtij viti krahas sfidave kanë shënuar progres edhe në disa fusha.
“Kemi shënuar rritje ekonomike, hapa të rëndësishëm në forcimin e sistemit të drejtësisë, kemi luftuar krimin e korrupsionin, kemi avancuar aleancat dhe kemi forcuar raportet me shtetet mike. Kosova është bërë fanar i demokracisë në rajon”, ka thënë Kurti.
Kurti ka folur edhe për vizitën e tij zyrtare dyjavore në Shtetet e Bashkuara të Amerikës(ShBA).
Kryeministri ka thënë se gjatë kësaj vizite ka takuar shtatë senatorë dhe 12 kongresistë, e shtatë zyrtarë të lartë të qeverisjes amerikane.