Për takimin me liderët e partive opozitare të thirrur nga kryeministri i Kosovës, Albin Kurti, vlerësohet se temë e diskutimit do të jetë mbajtja e zgjedhjeve të parakohshme, pasi “para formimit të Asociacionit, kryeministri Kurti do ta mbajë premtimin elektoral që e ka bërë”.
Kështu ka thënë politologu Fidan Ukaj në emisionin “Rreth e Rrotull”, duke shtuar se qasja e Kurtit ndaj ftesës për partitë opozitare është gabim, pasi, sipas tij, temat e përmendura për diskutim nuk janë në domenin e kryeministrit.
“Pashmangshëm do të jetë edhe Asociacioni, mundësia e përkrahjes së partive opozitare që me dërgu në interpretim në Gjykatë Kushtuese Asociacionin. Dhe, po ashtu, se temë tjetër do të ishte për zgjedhjet e parakohshme dhe tanimë e kemi një konfirmim nga PDK-ja, dhe mendoj se qasja e kryeministrit në ftesën e tij në adresë të partive opozitare ka qenë e gabueshme, shumë më e ndershme dhe më e sinqertë do të ishte t’i cekte temat tjera dhe jo të fshehët mbas një teme që nuk është as në domenin e kryeministrit”, ka deklaruar ai.
Ai, gjithashtu, ka theksuar se kryeministri Kurti ka problem me besimin në Gjykatën Kushtetuese, ndërsa nuk ka problem me formimin e Asociacionit, “sepse atë e ka pranuar në marrëveshjen e Brukselit”.