Kryeministri i Kosovës, Albin Kurti, ka thënë se qeveria që ai e drejton, është duke synuar t’i mbrojë qytetarët e vendit nga rritja e çmimeve të energjisë elektrike.
Këtë deklaratë Kurti e ka dhënë në kuadër të Procesit të Berlinit, ku edhe ka theksuar se qeveria është duke tentuar që të ulet kërkesa për energji, e që sipas tij, deri tani është ulur me mbi 6%.
“Si qeveri, ne po synojmë të mbrojmë qytetarët tanë nga rritja e çmimeve të energjisë, por edhe të sigurojmë që të ketë stimuj për të rritur efiçiencën e energjisë dhe për të ulur kërkesën për energji. Këtë vit kërkesa jonë për energji elektrike është ulur me mbi 6%. Ne synojmë ta mbajmë këtë trend, duke subvencionuar familjet që kursejnë energji dhe blejnë pajisje efiçiente për ngrohje”, ka shkruar Kurti.
Kryeministri i Kosovës foli edhe për marrëveshjet e nënshkruara në kuadër të Procesit të Berlinit, për të cilat, tha se do t’i ndihmojnë shumë Kosovës.
“Në kuadër të Procesit të Berlinit, sot, jetësuam Tregun e Përbashkët Rajonal me nënshkrimin e tri marrëveshjeve të mobilitetit: për lëvizjen e lirë me letërnjoftime; për njohjen e kualifikimeve të arsimit të lartë; si dhe për njohjen e kualifikimeve profesionale të mjekëve, dentistëve dhe arkitektëve”, ka thënë Kurti.
Kurti ka theksuar se marrëveshjet e nënshkruara, duhet të zbatohen dhe se pozita e Kosovës në procese rajonale duhet të përmirësohet.
Në Samitin e Procesit të Berlinit, Kurti është shprehur me fat që nuk varet nga gazi rus, teksa ka shtuar se Kosova ka nevojë të madhe për importin e energjisë elektrike, sidomos gjatë dimrit.