Kryeministri i Kosovës, Albin Kurti, ka thënë se gjatë operacionit kundër sulmuesve terroristë në veri, Policia e Kosovës ka konfiskuar një sërë municionesh e armësh, duke përshirë edhe pajisje të rënda ushtarake.
Në një postim në llogarinë e tij në platformën “X”, Kurti ka thënë se operacioni është ende duke vazhduar.
“Në operacionin e sotëm kundër terroristëve të armatosur, Policia e Kosovës konfiskoi qindra armë dhe municione, duke përfshirë pajisje të rënda ushtarake si mitralozë, granata dhe më shumë. Policia jonë mbetet në bashkëpunim të ngushtë me KFOR-in dhe EULEX-in. Operacioni është në vazhdim”, shkroi Kurti.
In today’s operation against armed terrorists, @Kosovo_Police confiscated hundreds of weapons, and ammunition, including heavy military equipment such as machine guns, grenades and more. Our police remains in close co-ordination with KFOR & EULEX. The operation is ongoing. pic.twitter.com/PfyXJYIqNw
— Albin Kurti (@albinkurti) September 24, 2023
Ndryshe, kreu i ekzekutivit bashkë me përfaqësuesit e komunitetit ndërkombëtar kanë ndezur qirinj në nderim të policit të Kosovës, Afrim Bunjaku, i cili u vra në Banjskë të Zveçanit nga grupi terrorist.
Në një postim në llogarinë e tij në platformën “X”, Kurti tha se sonte u ndezën qirinjtë e vogël për një shpirt të madh.
“Afrim Bunjaku u vra nga terroristët në orët e hershme të mëngjesit në krye të detyrës duke mbrojtur integritetin territorial dhe sundimin e ligjit të vendit tonë. Sonte ndezëm një qiri të vogël për një shpirt të madh ndërsa zotohemi të mbrojmë ata që kalojnë jetën e tyre duke na mbrojtur”, shkroi Kurti.
Një zyrtar policor është vrarë dhe tre të tjerë janë plagosur si pasojë e sulmeve ndaj Policisë së Kosovës në Banjskë të Zveçanit, mëngjesin e së dielës.