Kryeministri i Kosovës, Albin Kurti, i ka uruar mirëseardhje në Kosovë gazetares ukrainase, Lyudmila Makey, pasi ajo ishte detyruar të largohet nga vendi i saj, pas invazionit rus.
“Solidariteti ynë me popullin e Ukrainës dhe luftën çlirimtare kundër agresionit ushtarak rus janë të padiskutueshme”, ka shkruar Kurti në llogarinë e tij, në rrjetin social Facebook.
Ai ka falënderuar Qendrën Evropiane për Liri të Shtypit dhe Mediave (ECPMF), Federatën Evropiane të Gazetarëve (EFJ), Unionin Kombëtar të Gazetarëve të Ukrainës dhe Asociacionin e Gazetarëve të Kosovës, për bashkëpunimin në programin Gazetarët në Rezidencë (JiR) në Kosovë.
Kryeministri Kurti ka thënë se, Kosova qysh në fillim të konfliktit u është bashkuar vendeve perëndimore duke e dënuar agresionin rus në Ukrainë, dhe duke vendosur sanksione ndaj Rusisë.
“Ne mbesim të përkushtuar të punojmë së bashku me aleatët për të kontribuuar për paqen e qëndrueshme, stabilitetin afatgjatë dhe sigurinë rajonale e globale” ka thënë Kurti.
Shteti i Kosovës ka marrë përgjegjësinë që Makey dhe kolegët e saj, të kenë kushte të përshtatshme për punë dhe jetesë.