Kryeministri i Kosovës, Albin Kurti ka pritur në takim lamtumirës ambasadorin e Republikës së Çekisë, Pavel Bilek, të premtën e 30 qershorit.
Kurti e ka falënderuar ambasadorin Bilek për bashkëpunimin dhe angazhimin për avancimin e marrëdhënieve mes Kosovës dhe Republikës Çeke.
“Kryeministri kujtoi se ky bashkëpunim i mirë është shënuar vitin e kaluar me dorëzimin në kryeqytetin e Republikës Çeke, në Pragë, të Aplikacionit për anëtarësim e Kosovës në Bashkimin Evropian. Ngjarje historike për Kosovën dhe qytetarët, dhe rrugëtimin drejt Bashkimit Evropian si aspiratë dhe fat i Republikës së Kosovës”, njofton Kryeministria.
Në këtë njoftim thuhet se Presidenca Çeke në gjashtëmujorin e dytë të vitit të kaluar, ka ndihmuar Kosovën që të përparojë drejt integrimit në Bashkimin Evropian me rastin e pranimit të aplikacionit për anëtarësim në BE dhe ka kontribuar aktivisht në liberalizimin e vizave për qytetarët e Kosovës.
“Ambasadori Bilek po ashtu veçoi si moment për librat e historisë dorëzimin në Pragë të aplikacionit për anëtarësim në Bashkimin Evropian dhe forcimin e marrëdhënieve tregtare”, thuhet tutje në njoftim.