Kryeministri në detyrë i Kosovës, Albin Kurti, ka pritur në takim profesorin amerikan dhe njohësin e çështjeve të Ballkanit, Daniel Serwer, me të cilin ka biseduar për zhvillimet politike në Kosovë, procesin e integrimit euroatlantik dhe situatën e sigurisë në rajon.
Përmes një postimi në Facebook, Kurti bëri të ditur se Serwer ishte mysafiri i parë amerikan të cilit ia uroi 250-vjetorin e pavarësisë së Shteteve të Bashkuara të Amerikës.
“Sot pata nderin të pres në Zyrën e Kryeministrit profesorin amerikan dhe mikun e madh të Kosovës, Daniel Serwer, për një takim të përzemërt dhe frymëzues. Gjithmonë është kënaqësi të takohem me profesorin Serwer, i cili sot u bë mysafiri i parë amerikan të cilit ia urova përvjetorin e 250-të të pavarësisë së ShBA-ve”, shkroi Kurti.
Sipas Kurtit, gjatë takimit u diskutua për një sërë çështjesh me rëndësi për Kosovën dhe rajonin.
“Me profesorin biseduam për një gamë të gjerë temash të rëndësishme, duke përfshirë situatën e brendshme politike, hapat që Kosova po ndërmerr në përgatitje për anëtarësim në BE dhe NATO, si dhe zhvillimet gjeopolitike dhe implikimet për sigurinë e vendit tonë”, tha ai.
Në fund të postimit, Kurti e cilësoi Serwerin si një mik të madh të Kosovës, duke vlerësuar mbështetjen e tij ndër vite.
“Kosova është me fat që e ka një mik si Daniel Serwer, i cili kurrë nuk ka hezituar të flasë të vërtetën për popullin tonë dhe kërcënimet që paraqet Serbia ndaj sigurisë rajonale”, përfundoi Kurti.