Kryeministri në detyrë dhe njëherësh kryetari i Lëvizjes Vetëvendosje, Albin Kurti, ka reaguar pas debatit të fundit në emisionin Debat Plus në TV Dukagjini, ku u përballën kandidatët për kryetar të Prishtinës.
Kurti ka lavdëruar paraqitjen e kandidatit të partisë së tij, Hajrulla Çeku, duke e quajtur atë “kandidatin më të mirë që Prishtina e ka pasur ndonjëherë”.
“Paraqitja fantastike sonte e Hajrulla Çekut e vërteton se ai është kandidati më i mirë për kryetar që Prishtina e ka pasur ndonjëherë. Shumë suksese e na priftë e mbara, Hajro!”, ka shkruar Kurti në Facebook.
Ky reagim i Kurtit vjen ndonëse vetëm pak muaj më parë, ku u kishte bërë thirrje qytetarëve të mos i shohin debatet televizive, e anëtarëve të Vetëvendosjes të mos marrin pjesë në debate televizive, duke i cilësuar ato si të panevojshme.
Në Debat Plus, Çeku u përball me kandidatin e LDK-së, Përparim Rama, në diskutimin final për garën për kryeqytetin.