Kryeministri i Kosovës, Albin Kurti, në seancën e 24 tetorit në Kuvendin e Kosovës për Strategjinë Kombëtare të Sigurisë për vitet 2022-2027, ka thënë se është e dyta me radhë që nga shpallja e Pavarësisë së Kosovës.
Kreu i Qeverisë ka thënë se kjo është strategjia ombrellë e sigurisë së Kosovës, e cila paraqet mundësinë dhe vizionin për të ardhmen e vendit.
Ai ka thënë se me anë të kësaj strategjie, i është dhënë vëmendje e veçantë institucioneve të sigurisë.
“I kemi rritur 52 për qind buxhetin për forcën e sigurisë së Kosovës, 63 milionë sa ishte vitin e kaluar, tashmë është 102 milionë euro”, ka deklaruar Kurti.
Ndër të tjera, Kurti ka thënë se Qeveria e Kosovës ka ndarë buxhetin më të madh në historinë e forcës së sigurisë së Kosovës, duke e përafruar si shifër me vendet e NATO-s.
“Ky buxhet me lartësinë e tij është vendosje e një standardi të ri, për trajtimin që i bën Kosova forcave të saj armatosura dhe duhet të bëjë në të ardhmen”.
Ai ka falënderuar të gjithë ata kanë kontribuuar në fondin e sigurisë së Kosovës dhe ata që kanë vullnet të kontribuojnë përsëri.
Ndërkaq, kryeministri ka thënë se synimi i Kosovës është anëtarësimi në NATO dhe në Bashkimin Evropian si parakusht për zhvillim të qëndrueshëm të vendit dhe rajonit.
“Kjo strategji mundëson mbrojtjen e sovranitetit, integritetit territorial, ruajtjen e sigurisë, integrimin në struktura euroatlantike”.
Siç ka theksuar Kurti, kjo strategji është hartuar në bashkëpunim të ngushtë me të gjitha institucionet shtetërore dhe i është nënshtruar konsulimit të brendshëm e të jashtëm.