Kryeministri i Kosovës, Albin Kurti, është takuar me ambasadorin e Shteteve të Bashkuara të Amerikës në Kosovë, Jeffrey Hovenier.
Siç mëson RTV Dukagjini, bëhet fjalë për një takim të rregullt midis Kurtit dhe ambasadorit amerikan.
Pas takimit të tij me kreun e qeverisë, Hovenier është parë në oborrin e ndërtesës së Qeverisë teksa është larguar.
Ndërkaq, nga ndërtesa e Qeverisë së Kosovës është parë duke dalë edhe ambasadori i Britanisë së Madhe në Kosovë, Nicholas Abott.
Ai është takuar me zëvendëskryeministrin e parë, Besnik Bislimi.
Kjo për RTV Dukagjini, është konfirmuar nga kabineti i zëvendëskryeministrit Bislimi.
Megjithatë, ende nuk dihet arsyeja e takimeve.
Ndryshe, para mesnatës së një gushtit, Qeveria e Kosovës, kishte marrë vendim që të shtyjë implementimin e vendimeve të reciprocitetit të letërnjoftimeve me Serbinë dhe atë për targa.
Vendimi është marrë pas takimit të krerëve shtetërorë të Kosovës me ambasadorin amerikan, Jeffrey Hovenier.
ShBA-ja ka kërkuar të shtyhet implementimi i vendimeve për 30 ditë. Zbatimi i vendimeve është shtyrë deri më 1 shtator, por me kusht që të hiqen barrikadat në veri.