Kryeministri i Kosovës, Albin Kurti ka ftuar këshillin grevist në takim të martën.
Këtë e ka konfirmuar për Portalin Dukagjini, Zëdhënësi i Qeverisë së Kosovës, Përparim Kryeziu.
Një takim i tillë vie si rrjedhojë e grevës së BSPK-së dhe SBASHK-ut, grevë kjo e filluar që nga 25 gushti me kërkesë të ndarjes së 100 eurove për punëtorët deri në fuqizimin e Ligjit për Paga.
Që nga nisja e grevës, Kryeministri Kurti nuk ka zhvilluar asnjë takim me kreun e SBASHK-ut, Rrahman Jasharaj, ndonëse ka zhvilluar takime me kryetarin e BSPK-së, Atdhe Hykollin.
Sindikata e Bashkuar e Arsimit (SBASHK), të dielën e 11 shtatorit, pas takimit me kryetarët e Kuvendeve Sindikale Komunale të Arsimit Parauniversitar dhe të Universiteteve, ka vendosur që të vazhdojnë grevën.
Lidhur me këtë ka reaguar zëdhënësi i Qeverisë së Kosovës, Përparim Kryeziu, i cili përmes një postimi në llogarinë e tij në Facebook, ka thënë se deri më tani janë zhvilluar mbi 30 takime ndërmjet Qeverisë dhe sindikatave.
Sipas tij, ndonëse ka pasur takime, mungon arsyeshmëria e kërkesës për 100 euro shtesë.
“Gjithsej janë zhvilluar mbi 30 takime ndërmjet Qeverisë dhe sindikatave. Pra komunikim ka pasur. Takime ka pasur. Pjesa më e madhe kërkesave sindikale janë adresuar ose janë duke u adresuar. Mungon arsyeshmëria e kërkesës për 100 euro shtesë dhe gatishmëria nga sindikatat për ecur përpara”, ka shkruar ai.
Ai ka thënë se kryeministri Albin Kurti, zëvendëskryeministri i parë dhe shefi i stafit të kryeministri janë takuar të paktën dhjetë herë me kryetarin e BSPK, Atdhe Hykolli.
Më 3 shtator të këtij viti, Qeveria e Kosovës, përkatësisht Kryeministri Kurti së bashku me Ministrin e Financave, Hekuran Murati kishte prezantuar pakon për përballimin e inflacionit. Pjesë në të ishte edhe ndarja e 50 euro për muajin shtator për punëtorët e sektorit publik.