Kryeministri në detyrë, Albin Kurti, në margjina të Forumit Ekonomik Botëror, ka takuar edhe Komisioneren e Bashkimit Evropian për Zgjerim, Marta Kos.

Siç bëhet e ditur në njoftim, në takim është diskutuar mbi progresin ekonomik dhe avancimin demokratik të vendit të cilat janë kyçe në rrugën tonë drejt Bashkimit Evropian.

“Raporti i Vendit i Komisionit Evropian për vitin 2025 dëshmoi se Kosova ka vazhduar progresin në integrimin evropian. Asnjë vend i Ballkanit Perëndimor nuk ka qenë më i përgatitur në momentin e marrjes së statusit të vendit kandidat, andaj edhe progresi demokratik i Kosovës meriton të vlerësohet me këtë status”, thuhet në njoftimin e Zyrës së Kryeministrit.

Po ashtu bëhet e ditur se në takim u diskutua edhe rreth situatës gjeopolitike, Planit të Rritjes, bashkëpunimit rajonal dhe aktualitetit.

Sa i përket bashkëpunimit rajonal, Kurti ka theksuar se Kosova luan rol aktiv dhe konstruktiv dhe mbështet integrimin më të gjerë ekonomik të rajonit bazuar në vlerat dhe standardet e Bashkimit Evropian.