Në kuadër të Forumit Ekonomik Botëror në Davos, Kryeministri i Republikës së Kosovës, Albin Kurti, ka takuar të marten e 17 janarit Presidentin e Republikës Demokratike të Timorit Lindor, José Manuel Ramos Horta dhe Ministren për Punë të Jashtme dhe Bashkëpunim, Adaljiza Magno.
Në takim siç njofton zyra e kryeministrit është theksuar marrëdhënia unike ndërmjet Kosovës dhe Timorit Lindor si dhe historia e ngjashme e sundimit të huaj në të dy shtetet.
Kryeministri Kurti e ka falënderuar Presidentin Ramos Horta për mbështetjen e dhënë ndajRepublikës së Kosovës.
Gjithashtu është potencuar nënshkrimi i marrëveshjes për vendosjen e marrëdhënieve diplomatike, e nënshkruar më 9 mars 2022 mes Republikës së Kosovës dhe Republikës Demokratike të Timorit Lindor. Me këtë nënshkrim, u theksua se distanca ndërmjet dy vendeve është shkurtuar dhe është hapur rruga e bashkëpunimit.
Ndërsa, në takim është shtuar se si dy nga shtetet më të reja në botë, që ndajnë të njëjtat vlera të lirisë dhe demokracisë, Kosova dhe Timori Lindor duhet të bashkëpunojnë më ngushtë në shkëmbimin e përvojave të shtetndërtimit dhe njohjes ndërkombëtare.