Kryeministri i Kosovës, Albin Kurti, i ka shprehur ngushëllime të thella në emër të Qeverisë së Kosovës, ambasadorit të Turqisë, Sabri Tunç Angili, për viktimat që humbën jetën si pasojë e tërmetit.
Kurti ka takuar ambasadorin, të cilit i shprehu mirënjohje për ndihmën dhe kontributin e dhënë Kosovës nga populli dhe shteti turk “si mik e partner i dëshmuar i popullit dhe Republikës së Kosovës”.
“Në emër të Qeverisë së Kosovës, Kryeministri i shprehu ngushëllimet më të thella ambasadorit për viktimat e tërmetit, që e goditi Turqinë. Ai theksoi se Republika e Kosovës është pranë Republikës së Turqisë dhe popullit turk dhe mbi bazën e kapaciteteve të saj, me Forcën e Sigurisë së Kosovës, Policinë e Kosovës, Agjencinë për Menaxhimin e Emergjencave dhe ekipet mjekësore, kanë ndihmuar në këtë kohë të vështirë”, thuhet në njoftimin e zyrës së kryeministrit.
Në këtë takim u bisedua për mundësitë e zgjerimit të mëtejmë të bashkëpunimit bilateral.
“Veçanërisht në ekonomi, siguri, mbrojtje dhe kulturë. Duke folur për bashkëpunimin ekonomik, u theksua potenciali për rritje të shkëmbimeve tregtare, përmirësimi i bilancit tregtar, si dhe shtimi i investimeve nga bizneset e Turqisë. U bisedua edhe për lidhjet e forta kulturore ndërmjet Turqisë dhe Kosovës dhe mundësitë për organizime të përbashkëta të ngjarjeve kulturore dhe artistike”, vijon njoftimi.
Në anën tjetër ambasadori ka shprehur mirënjohje për ndihmën që Kosova i ka dhënë institucioneve dhe popullit turk në rajonet e goditura nga tërmeti shkatërrues.