Hapi i marrë nga Kosova për aplikimin e antarësimit në Bashkimin Evropian ishte temë e rëndësishme diskutimi në mes Kryeministrit të Republikës së Kosovës, Albin Kurti dhe eurodeputetin e njëherit, raportuesin në Parlamentin Evropian mbi çështjen e liberalizimit të vizave për Kosovën, Thijs Reuten.
Zyra e Kryeministrit ka bërë të ditur se Reuten cilësoi si të rëndësishme mundësinë e dhënies së perspektivës evropiane qytetarëve të Kosovës.
“Kryeministri Kurti shprehu mirënjohjen për përkrahjen e tij të vazhdueshme dhe të grupit të Aleancës Progresive të Socialistëve dhe Demokratëve (S&D), ndaj vendit tonë në çështjen e liberalizimit të vizave, aplikimit për anëtarësim në BE, e rrugëtimit tonë të përgjithshëm evropian.Hapi i ndërmarrë nga ana e Kosovës përmes aplikimit për anëtarësim në BE ishte temë e rëndësishme e diskutimit, ku u theksua se ka qenë i natyrshëm, vullnet i qytetarëve dhe dëshmia e radhës e orientimit të vendit ndaj vlerave e standardeve demokratike e evropiane. Eurodeputeti Reuten tha se është e rëndësishme që qytetarëve të Kosovës t’iu jepet perspektiva evropiane dhe të ecet përpara drejt një procesi kredibil të bazuar në meritokraci e shënim të progresit”, thuhet në njoftim.
Reuten përgëzoi Republikën e Kosovës për progresin në zbatimin e reformave të agjendës evropiane e politikat qeverisëse e njhëherit, edhe përparimin e bërë në zhvillim ekonomik dhe sundimin e ligjit.
Pjesë e takimit qenë edhe ambasadori i Kosovës në Bruksel, Agron Bajrami dhe zëvendësministri i Punëve të Jashtme dhe Diasporës, Kreshnik Ahmeti.
Takimi i Kurtit me Reuten realizohet në kuadër të vizitës zyrtare dyditore të Kurtit.