Kryeministri i Kosovës, Albin Kurti, të mërkurën e 18 janarit, është takuar me zëvendëspresidenten e Zvicrës, Viola Amherd dhe ministrin e Ekonomisë, Guy Parmelin, në kuadër të Forumit Ekonomik Botëror që po mbahet në Davos të Zvicrës.
Kryeministri Kurti ka shprehur mirënjohjen e thellë për kontributin që Zvicra ka dhënë për Kosovën dhe për ndihmën e vazhdueshme në programet e zhvillimit të ekonomisë dhe demokracisë.
“U theksua rëndësia e mërgatës sonë në Zvicër, që janë urë lidhëse mes dy shteteve tona dhe kontribuojnë në ekonominë e të dyja vendeve. U bisedua për mundësitë për më shumë bashkëpunim në ekonomi dhe mbrojtje. Me theks të veçantë u bisedua edhe për shkëmbim të përvojave në teknologji të informacionit dhe edukim”, thuhet në njoftimin e zyrës së Kryeministrit.
Kryeministri Kurti, po ashtu, ka ritheksuar përkushtimin e Qeverisë së Kosovës për reforma strukturore në ekonomi, politikë, sundim të ligjit dhe demokraci funksionale në përputhje me standardet evropiane.
Ndryshe, kryeministri Kurti është takuar edhe me Emisarin e Bashkimit Evropian për dialogun Kosovë-Serbi, Miroslav Lajçak.
Me anë të një postimi në llogarinë e tij në Twitter, Lajçak ka theksuar se gjatë këtij takimi është diskutuar për hapat e ardhshëm në dialog.
Pos kësaj, ata diskutuan edhe për normalizimin e marrëdhënieve dhe çështjet aktuale.
“E nisa ditën time në Davos në Forumin Ekonomik Botëror, me një diskutim të thellë me kryeministrin e Kosovës, Albin Kurti. Folëm për hapat e ardhshëm në dialog, për normalizimin e marrëdhënieve dhe çështjet aktuale”, shkroi Lajçak.