Kryeministri i Kosovës, Albin Kurti, të martën ka pritur në takim zëvendëspresidentin në Korporatën e Sfidave të Mijëvjeçarit (MCC), Cameron Alford.
Alford e ka uruar kryeministrin Kurti për fillimin e ri e të rëndësishëm për Kosovën, përmes funksionalizimit të programit të përbashkët të Kosovës në mbështetje dhe bashkëpunim të Shteteve të Bashkuara të Amerikës.
Siç ka njoftuar Zyra e Kryeministrit, në takim ishte edhe ambasadori amerikan në Kosovë, Jeffrey Hovenier, dhe drejtori i Programit të MCC, Rinor Gjonbalaj.
“Kryeministri njoftoi z.Alford me suksesin në ankandit e energjisë solare dhe me strategjinë ambicioze të Qeverisë për energji, që shërben edhe si platformë e punës së Kompaktit. Më tej, bashkë me ministren e Ekonomisë, Artane Rizvanolli dhe ministrin e Financave, Punës dhe Transfereve, Hekuran Murati, njoftoi z.Alford me vizionin e Qeverisë në kuptim të zhvillimit të ekonomisë dhe rritjes së punësimit përmes investimit në aftësimin profesional, investimin në energji dhe në përgatitjen e kuadrove të reja në fushat STEM përmes bursave të studimit”, thuhet në njoftimin e Kryeministrisë.
Sipas njoftimit, programi Kompakt, i cili komponent kryesor ka ndërtimin e kapaciteteve akumuluese të energjisë, parasheh edhe komponenta të rëndësishme për zhvillim të kapaciteteve njerëzore e rritje të barazisë gjinore në sektorin e energjisë në vend.
Programi Kompakt ka vlerë prej 236.7 milionë dollarësh, nga të cilat 202 janë grant nga Shtetet e Bashkuara të Amerikës, kurse 34.7 milionë janë bashkëfinancim nga Qeveria e Republikës së Kosovës.
Së bashku me MCC dhe MCA, ashtu si me shumë projekte e programe të tjera të USAID, e në partneritet me SHBA-në, Qeveria e Republikës së Kosovës zotohet të zbatojë programet në përpikëri dhe në dobi të qytetarëve të saj.
Ceremonia e nënshkrimit të marrëveshjes për hyrje në fuqi të MCC Compakt mbahet këtë të martë në orën 17:00.