Kryeministri i Kosovës, Albin Kurti, i ka bërë thirrje faktorit ndërkombëtar që ta sanksionojë Serbinë lidhur me sulmin e ndodhur në Banjskë të Zveçanit, ngase, sipas tij, në rast se Serbia nuk ndëshkohet, atëherë ajo mund ta përsërisë krimin.
Në foltoren e Kuvendit të Kosovës, në fjalën e tij, kryeministri Kurti tha se sulmuesit të cilët arritën të arratisen, duhet të dorëzohen në organet e Kosovës.
“Të dielën përjetuam një sulm agresioni të bandave kriminale e terroriste të Serbisë ndaj shtetit tonë. Sulmi i orkestruar i bandave të maskuara kriminale e terroriste vrau zyrtarin tonë policor, rreshterin Afrim Bunjaku dhe plagosi një polic tjetër. Ishte një ditë e rëndë për vendin tonë dhe mbarë kombin tonë. Policisë së Kosovës do t’i mungojë një pjesëtar i përkushtuar i saj ashtu siç do t’i mungojë edhe familjes e shoqërisë, por vrasja e tij u kthye në angazhim edhe më të shtuar në luftim e bandave kriminale e terroriste dhe në fitore të betejës nga Policia e Kosovës. Terroristët ose janë vrarë, ose janë arrestuar ose janë në ndjekje pasi që ikën. Afrim Bunjaku është heroi më i ri i Kosovës”, tha Kurti.
“Ai u vra në pritë në orën 03:00 të mëngjesit, ndërkaq me tu zbardhur drita, u pa që çfarëdo bande kriminale dhe terroriste nuk kanë kurrfarë shansi ndaj Policisë së Kosovës. Ata u vranë, u arrestuan ose po ndiqen, sepse janë në ikje. Sulmuesit që arritën të ikin duhet të ekstradohen, duhet të dorëzohen në organet e Kosovës. Këto organizata duhet të shpallen terroriste edhe nga vendet partnere. Për këtë akt të agresionit ndaj Kosovës, Serbia duhet të sanksionohet e ndëshkohet ndërkombëtarisht, nëse kalon e pandëshkuar, atëherë ajo do ta përsërisë krimin”, shtoi Kurti.
Sipas kreut ekzekutiv, armatimi ushtarak dhe trajnimet luftarake që i kishin profesionistët serbë që sulmuan të dielën janë që të gjitha nga Serbia.
“Është e rëndësishme të theksohet se bëhet fjalë për një bandë kriminale e terroriste, që janë profesionistë me trajnime luftarake. Serbia ua dha pajisjet ushtarake, ua kreu trajnimet luftarake dhe qëllimet politike e mbështetjen logjistike”, ka thënë Kurti.