Kryeministri i Kosovës, Albin Kurti, në takimin e Këshillit Kombëtar për Ekonomi dhe Investime, u ka bërë thirrje bizneseve vendore më konkurruese, shoqatave të biznesit të vazhdojnë bashkëpunimin me Qeverinë.
Kryeministri Kurti ka theksuar se Qeveria e suksesshme e ndihmon sektorin privat, e sipas tij, konkurrueshmëria ekonomike “do të sjellë prosperitet dhe mirëqenie”.
“U bëj thirrje bizneseve tona më konkurruese, shoqatave të biznesit dhe projekteve të financuara nga donatorët që ta vazhdojnë të forcojnë edhe më tej bashkëpunimin me Qeverinë e Republikës së Kosovës. Së bashku ne mund të zhvillojmë plane strategjike dhe operacionale që rrisin investimet e huaja direkte, eksportet dhe nxisin zhvillimin efektiv të biznesit”, ka deklaruar Kurti.
Sipas tij, një dialog publik privat i strukturuar mirë mund ta transformojë ekonominë e vendit.
“Një dialog i fuqishëm publik privat forcon besimin ndërmjet sektorit privat dhe atij publik, besimi është armatura në themelin tonë ekonomik dhe me të mund të ndërtojmë edhe gjera të mëdha, pa të edhe punët më të mira dështojnë. Përmes dialogut ne identifikojmë njësitë e zhvillimit të sektorit privat, duke rritur investimet e huaja direkte, duke shtuar eksportet dhe duke ngritur konkurrencën e përgjithshme të bizneseve kosovare”, ka theksuar ai.
Mes të tjerash, ai ka theksuar se është e rëndësishme edhe fuqia punëtore, pasi, sipas tij, nëpërmjet edukimit profesional që synon plotësimin e nevojave të sektorit privat, po krijojnë një të ardhme më të sigurt për të gjithë.
“Ne duam që qytetarët tanë të jenë të përgatitur mirë dhe konkurrues pikërisht këtu në Kosovë. Duke krijuar mundësi të vlefshme punësimi, ne përmirësojmë mirëqenien e qytetarëve tanë. Kjo nuk ka të bëjë vetëm me fitimet, ka të bëjë me njerëzit”, ka shtuar ai.