Kryeministri i Kosovës, Albin Kurti, ka udhëtuar për në Mbretëri të Bashkuar.
Si thuhet në njoftimin e Zyrës së Kryeministrit, në qëndrimin e tij njëditor atje, krahas takimeve me zyrtarë të institucioneve, Kurti do të marrë pjesë në panelin e diskutimit mbi sfidat e sigurisë me të cilat ballafaqohet Ballkani Perëndimor, të organizuar nga Instituti i Politikave “Chatham House“.
“Shqetësimet e sigurisë nuk janë të reja për kombet e Ballkanit Perëndimor. Është një rajon që ka përjetuar paqëndrueshmëri të vazhdueshme etnike, fetare dhe politike, si dhe cenueshmëri ndaj efekteve të luftës në Ukrainë. Ndërsa këto vende kanë kaluar tranzicionin e tyre politik dhe ekonomik, rreziqet mbeten për qeveritë e tyre dhe Evropën”, thuhet në përshkrimin e panelit, ku do të marrë pjesë Kurti, teksa pritet të diskutohet se cilat janë sfidat e sigurisë me të cilat përballet Ballkani Perëndimor.