Kryeministri i Kosovës, Albin Kurti, në kuadër të vizitës së tij zyrtare në Shtetet e Bashkuara të Amerikës (SHBA) është takuar me bordin drejtues të kompanisë Microsoft.
Ai përmes një postimi në llogarinë e tij në ‘Twitter’ ka shkruar se kampusi i Microsoft në Silicon Valley është një frymëzim për bashkëpunimin e komunitetit, korporatave dhe korporatës planetare.
Kurti, ndër të tjera, ka thënë se inovacioni dhe qëndrueshmëria nuk janë në kundërshtim, pasi ato rrjedhin prej njëra-tjetrës.
Innovation and sustainability are not in opposition: one flows from the other. The @Microsoft campus in Silicon Valley is an inspiration for community, corporate, and planetary cooperation. pic.twitter.com/UwN10MdL2e
— Albin Kurti (@albinkurti) May 11, 2022
I pari i Qeverisë, krahas vizitë së tij në SHBA, është takuar edhe me bordin drejtues të platformës online “LinkedIn”, të cilin e ka ftuar që të investojnë në Kosovë.
Ai përmes një postimi në llogarinë e tij në Twitter, ka shkruar se investimet e kompanive amerikane, siç është LinkedIn do të hapnin vende të reja të punës për qytetarët.
“Potenciali në fushën e IT-së është në rritje, dhe Kosova ofron një klimë veçanërisht të favorshme investimi për kompanitë amerikane të teknologjisë. Kjo nga ana tjetër do të sigurojë vende të reja pune me cilësi të lartë për qytetarët e Kosovës, siç e ndava gjatë një takimi me drejtuesit e LinkedIn”, ka shkruar Kurti.
The high-growth potential of 🇽🇰's IT landscape provides an especially favorable investment climate for 🇺🇸 tech companies. This will in turn provide new, high-quality jobs for our people, as I shared during a meeting with LinkedIn executives. pic.twitter.com/gNJ4kdvVog
— Albin Kurti (@albinkurti) May 10, 2022
Ndërkaq, në ditën e parë të vizitës së tij në Shtetet e Bashkuara të Amerikës (SHBA), kryeministri i Kosovës, Albin Kurti, është pritur në takim nga kryeshefja e Korporatës së Sfidave të Mijëvjeçarit (MCC), Alice Albright.
Në njoftimin e zyrës së kryeministrit thuhet se ky takim shënon fillimin e negociatave me MCC-në për projektin Kompakt, që, sipas tyre, e kalon shumën e 200 milionë dollarëve e që parasheh ndërtimin e sistemeve akumuluese të energjisë.
Në këtë takim nga pala kosovare kanë marrë pjesë ministrja e Ekonomisë, Artane Rizvanolli, ambasadori i Republikës së Kosovës në Washington DC, Ilir Dugolli, Koordinatori Kombëtar për Zhvillimin e Programit Kompakt me MCC, Lum Mita.
Ndërkaq, nga përfaqësuesit e MCC-së, kanë marrë pjesë Jonathan Brooks, zëvendëspresident për programet në Evropë, Azi, Paqësor dhe Amerikë Latine, Thomas Kelly, zëvendëspresident për politika dhe vlerësim, si dhe Paula Garcia Tufro, shefe e stafit të kryeshefes Albright.
Kryeministri Kurti në SHBA ka takuar edhe përfaqësues të gjigantit të taksive, Uber, por po kritikohet me të madhe në Kosovë që nuk po takohet me politikanë të profilit të lartë atje.