Kryeministri i Kosovës, Albin Kurti, ka zhvilluar një bisedë telefonike me të Dërguarin e posaçëm të Mbretërisë së Bashkuar për Ballkanin Perëndimor, Sir Stuart Peach.
Në një njoftim për media, thuhet se Kurti i ka shprehur ngushëllime emisarit britanik “për ndarjen nga jeta të Madhërisë së saj, Mbretëreshës Elizabetë II”.
Po ashtu, në komunikatë thuhet se u theksua rëndësia për më shumë koordinim në politikën rajonale, “me qëllimin e përbashkët për anëtarësim në Bashkimin Evropian dhe të forcimit të aleancës veriatlantike, për paqe dhe siguri në rajon dhe më gjerë”.
Kurti ka theksuar angazhimin e Qeverisë së Kosovës, për t’u bërë pjesë e Programit Partneriteti për Paqe të NATO-s, derisa shteti i Kosovës të bëhet anëtar i plotë i kësaj organizate.
Po ashtu, në bisedën me emisarin britanik, Kurti ka folur edhe për pasojat ekonomike për shkak të luftës në Ukrainë. Kreu i qeverisë e ka njoftuar atë për masat e ndërmarra nga qeveria, nëpërmjet Pakos së Ringjalljes Ekonomike, asaj për përballje me inflacionin si dhe masat e prezantuara të subvencionimit për efiçiencë të energjisë për qytetarët.