Kërkesa e Abelard Tahirit të PDK-së, për dorëheqjen e ministres së Tregtisë, Rozeta Hajdari, nuk i ka pëlqyer Mimoza Kusarit të grupit parlamentar të LVV-së.
Tahiri kërkoi që ministrja Hajdari të shkarkohet për shkak të aktakuzës ndaj saj, për mosdeklarim të pasurisë.
Atij iu kundërpërgjigj Kusari-Lila, duke thënë se seanca e Kuvendit nuk është thirrur për një gjë të tillë.
Ajo ka kërkuar nga Tahiri që për këtë çështje ta presë një seancë tjetër, dhe projektligjet e parapara të votohen.
“Ministrja Hajdari e prezantoi projektligjin për sigurinë e produkteve, një projektligj tepër të rëndësishëm edhe për agjendën evropiane në kuadër të marrëveshjes së stabilizim asocimit. E prita një elbaorim të mirëfilltë të projektligjit edhe si anëtarë të komisionit për ekonomi. Në mënyrë që të tregojmë se jemi kthyer me përkushtim e seriozitet në vitin 2023”, ka thënë ajo.
“Për mbarvajtjen, funksionimin apo mandatin e Hajdarit, i njëjti grup ka kërkuar një seancë të veçantë më një rezolutë të cilën e keni propozuar. Po e njëjta ka mbetur në linjën e temave të patrajtuara, për shkak të agjendës së ngarkuar”, ka vijuar ajo.
Sipas Tahirit, ajo është ministrja e parë në Kosovë që e mban Qeveria Kurti, e cila është në detyrë dhe nuk e ka deklaruar pasurinë.