Shefja e Grupit Parlamentar të Lëvizjes Vetëvendosje (LVV), Mimoza Kusari-Lila, ka bërë të ditur se seanca e radhës do të mbahet të enjten e 20 tetorit.
Kusari-Lila ka njoftuar se kjo seancë do të jetë vetëm me dy pika të rendit të ditës.
“U dakorduam që seanca e radhës të jetë me 20 tetor, në ora 10:00, me dy pika të rendit të ditës”, ka deklaruar ajo.
Pika e parë e rendit të ditës do të jetë, shqyrtimi i parë i projektligjit për mbështetjen e punëve publike, ndërkaq pika e dytë në rend dite do të jetë, masat e përkohshme të produkteve themelore në raste të destabilizimit në treg, apo vendosja e çmimeve tavan për produktet themelore.
Ndër të tjera, ajo ka bërë të ditur se më 27 tetor, do të ketë seancë të re plenare, ku në rend dite do të jetë shqyrtimi i parë i projektligjit për faljen e masave ndëshkimore të vendosura gjatë periudhës së Pandemisë COVID-19, dhe do të bëhet shqyrtimi i pikave të mbetura që nga 7 gushti.