Ministrja e Drejtësisë, Albulena Haxhiu, ka njoftuar se ka pranuar kërkesa nga dy qytetarë, të cilët kanë kërkuar nga Haxhiu që t’ua mundësojë transferimin e tyre në Kosovë.
Sipas ministres së Drejtësisë, Mehmetaj dhe Dula janë duke u mbajtur në burgjet e Serbisë mbi pretendimet për kryerjen e krimeve të luftës kundër popullatës civile në Kosovë gjatë vitit 1999.
“Çdo akuzë ndaj tyre për krimet e pretenduara, duhet trajtuar nga organet e drejtësisë në Republikën e Kosovës”, ka shkruar Haxhiu në Facebook.
Më poshtë mund ta lexoni postimin e plotë të ministres së Drejtësisë, Albulena Haxhiut.
Javën e kaluar kam kërkuar nga Ministrja e Drejtësisë në Serbi që dy qytetarët tanë t’i transferojë në Republikën e Kosovës.
Nezir Mehmetaj dhe Petrit Dula mbahen në Serbi mbi pretendimet për kryerjen e krimeve të luftës kundër popullatës civile në Kosovë gjatë vitit 1999.
Z.Mehmetaj dhe z.Dula janë qytetarë të Kosovës pra edhe nën mbrojtjen e Republikës. Procesi i deritanishëm ndaj dy qytetarëve të Republikës së Kosovës është i përbërë nga shkelje të rënda të të drejtave të njeriut, për vite të tëra.
Çdo akuzë ndaj tyre për krimet e pretenduara, duhet trajtuar nga organet e drejtësisë në Republikën e Kosovës.