Kuvendi i Kosovës të enjten e 27 tetorit duke filluar nga ora 10:00 do të mbajë seancën e radhës.
Kështu ka bërë të ditur Shefja e Grupit Parlamentar të Lëvizjes Vetëvendosje (LVV), Mimoza Kusari-Lila pas mbledhjes së Kryesisë së Kuvendit.
Kusari-Lila ka thënë se në këtë seancë në mesin e shumë pikave në rend dite do të jetë shqyrtimi i projektligjit për faljen e masave ndëshkimore gjatë periudhës së pandemisë me COVID-19.
Ndërsa shefi i GP të PDK-së, Abelard Tahiri pas mbledhjes së kryesisë ka thënë për çështjen e targave se secili veprim i Qeverisë së Kosovës që ndërmerret në koordinim me ShBA do të përkrahet nga PDK.
Ndërkaq, shefi i GP të AAK-së, Besnik Tahiri ka thënë se është e papranueshme që ligji i pagave të shtyhet.
“Ajo që dua të theksoj ka të bëjë me ligjet vitale që nuk po vinë në kuvend, ligji i pagave që po shtyhet, është e papranueshme”.
Ai ka kërkuar që të ketë proces të vendimmarrjes dhe këto ligje të vijnë në Kuvend.