Kryetare e Kuvendit të Kosovës, Albulena Haxhiu, ka konstatuar të konstituuar legjislaturën e XI të Kuvendit të Kosovës, pasi janë zgjedhur nënkryetarët nga radhët e LDK-së, të komunitetit serb dhe komuniteteve joshumicë joserbe.

Në këtë seancë Haxhiu tha se përkundër thirrjeve të sërishme që Partia Demokratike e Kosovës të marrë pjesë në seancë dhe atë për herë të tretë, deputetët e kësaj partie s’gjenden në seancë.

Ajo ka thënë se bazuar në vendimin e Gjykatës Kushtetuese askush s’mund ta mbajë të bllokuar konstituimin.

Kujtim Shala është zgjedhur nënkryetar i Kuvendit të Kosovës nga radhët e Lidhjes Demokratike të Kosovës.

Ndërkaq, me 62 vota për, Tanja Vujoviq është zgjedhur nënkryetare e Kuvendit.

Emilia Rexhepi është zgjedhur nënkryetare nga radhët e komuniteteve joshumicë joserbe, me 70 vota për dhe 7 abstenime.

Pas përfundimit të votimeve për nënkryetarët, kryesuesja e seancës, Albulena Haxhiu, ka mbyllur seancën e Kuvendit.