Kuvendi i Kosovës do të mbajë dy seanca në javën e ardhshme.
Shefja e Grupit Parlamentar të Lëvizjes Vetëvendosje, Mimoza Kusari – Lila, ka njoftuar se më datat 4 dhe 5 prill do të zhvillohen seancat parlamentare.
Seanca e veçantë për të shënuar 25-vjetorin e Betejës së Kosharës fillon në ora 10:00, ndërsa seanca e rregullt përmban në agjendën e saj diskutimin e kërkesës së opozitës për hetim parlamentar lidhur me subvencionimin e teksteve shkollore për periudhën 2023-2024.
Gjithashtu, në këtë javë, do të mbahet edhe një seancë për pyetje parlamentare, e cila pritet të mbahet të premten me fillim në ora 10:00.
“Më datën 4 dhe 5 prill, 4 prill do të jenë dy seanca, është dakorduar sot në kryesi që seanca e veçantë për 25-vjetorin e Betejës së Kosharës të mbahet me fillim në ora 10:00, ndërsa seanca e rregullt të fillojë në ora 11:00. Ku do të fillohet diskutimi i kërkesës së opozitës për themelimin e një komisioni hetimor parlamentar lidhur me procesin e subvencionimit të blerjes së tekste shkollore, 2023 – 2024. Ndërsa, seancë tjetër me vetëm pyetje parlamenatare do të mbahet të premten, më 5 prill, me fillim në ora 10:00”, ka deklaruar Kusari – Lila.
Marrëveshjet ndërkombëtare do të jenë gjithashtu në agjendën e diskutimit.