Të enjten e 28 korrikut, në Kuvendin e Kosovës do të zhvillohet seanca plenare ku në rend dite është shqyrtimi i disa projektligjeve.
Fillimisht janë deklarimet jashtë rendit të ditës dhe më pas pyetjet parlamentare para shqyrtimit të projektligjeve.
Në rend dite është shqyrtimi i projektligjit për ratifikimin e Marrëveshjes së Partneritetit për Kornizën Financiare ndërmjet Kosovës dhe Komisionit Evropian për marrëveshjet për zbatimin e ndihmës financiare të Unionit për Kosovën në kuadër të instrumentit të paraanëtarësimit (IPA III).
Pos kësaj, do të shqyrtohet projektligji për ratifikimin e marrëveshjes për financim të politikave zhvillimore për financa publike dhe rritje të qëndrueshme ndërmjet Kosovës dhe Asociacionit Ndërkombëtar për Zhvillim.
Po ashtu, do të shqyrtohet edhe projektrregullorja e Kuvendit.
Shqyrtimi i dytë i projektligjit për financimin e subjekteve politike, ai për ndryshimin e ligjit për themelimin e Fondit Kosovar për Garanci Kreditore, shqyrtimi i parë i projektligjit për rregullimin e çmimit të produkteve medicinale, ai për Shëndetësi dhe shqyrtimi i raportit vjetor të Agjencisë për Ndihmë Juridike Falas më 2021 janë pikat e tjera të rendit të ditës.
Ndryshe, më 25 korrik, kryesia e Kuvendit është dakorduar që të caktohen dy seanca të Kuvendit, njëra më 28 korrik (të enjten) kurse tjetra me 29 (të premten), e cila është vazhdim i seancës së kaluar.
Në seancën e së premtes një nga pikat kryesore të rendit të ditës do të jetë diskutimi për mosliberalizimin e vizave për Kosovën.