Kuvendi i Kosovës ka publikuar rendin e ditës për seancën konstituive, e cila do të mbahet të enjten duke filluar nga ora 10:00.
Sipas njoftimit të Drejtorisë për Media dhe Marrëdhënie me Publikun, seanca do të nisë me formimin e Komisionit të Përkohshëm për Verifikimin e Kuorumit dhe Mandateve të Deputetëve.
Më pas, deputetët e zgjedhur do të bëjnë betimin, ndërsa në vazhdim pritet zgjedhja e kryetarit të Kuvendit dhe e nënkryetarëve. Për zgjedhjen e nënkryetarëve kërkohet shumicë e thjeshtë e votave.
Ende nuk është bërë e ditur nëse pas përfundimit të seancës konstituive do të thirret edhe një seancë tjetër për zgjedhjen e Qeverisë së re.