Kuvendi i Kosovës ka shkarkuar kryesuesen dhe tre anëtarët e Bordit të Komisionit të Pavarur për Miniera dhe Minerale (KPMM) në seancën e sotme.
Partitë opozitare nuk janë pajtuar me këtë shkarkim, të cilat nuk kanë marrë pjesë në votim. Deputetët opozitarë kanë deklaruar se ky bord ishte emëruar nga vet pushteti, por tashmë po shkarkohen jashtëligjshëm.
Shumica parlamentare me votim ka shkarkuar kryesuesen e bordit, Selvete Grajqevci Pllana, Gani Kastrati anëtar, Gani Maliqin anëtar dhe po ashtu Rrezarta Pushkolli Makollin e cila ka qenë anëtare e bordit.
Komisioni për Ekonomi, Industri, Ndërmarrësi dhe Tregti ka rekomanduar që Kuvendi të shkarkojë anëtarët e Komisionit të Pavarur për Miniera dhe Minerale.
Ndërsa, deputeti i VV-së, Armend Muja ka thënë se kanë konstatuar që në vazhdimësi, janë licencuar kompani që nuk kanë kryer detyrimet ndaj KPMM-së dhe po ashtu janë proceduar penalisht për shkelje të ligjit.