Presidentja e Bankës Qendrore Evropiane (BQE), Christine Lagarde, paralajmëroi sot se nëse presidenti i SHBA-së, Donald Trump, do të arrinte të merrte kontrollin mbi Rezervën Federale të SHBA-së (Fed), kjo do të përbënte “një rrezik shumë serioz për ekonominë amerikane dhe atë botërore”.
Në një intervistë për radiostacionin francez Radio Classique, Lagarde theksoi se një skenar i tillë “do të ishte i vështirë për t’u realizuar”, pasi Gjykata Supreme e SHBA-së ka vendosur që një guvernator i Fed-it mund të shkarkohet vetëm në rast të shkeljeve serioze.
“Nëse kjo do të ndodhte, pasojat do të ishin shumë shqetësuese, sepse politika monetare e Rezervës Federale ndikon drejtpërdrejt në stabilitetin e çmimeve dhe punësimin, dhe efektet do të përhapeshin në mbarë botën”, paralajmëroi ajo.
Deklaratat e Lagarde vijnë pas tensioneve të fundit mes Trump dhe Fed-it. Javën e kaluar, presidenti amerikan shkarkoi një nga anëtaret e Bordit Federal të Guvernatorëve, Lisa Cook, ndërkohë që ka ushtruar presion mbi bankën qendrore për të ulur normat e interesit, pavarësisht hezitimit të zyrtarëve për shkak të rrezikut të rritjes së inflacionit.
E pyetur nëse SHBA-të mbeten një vend i qeverisur nga sundimi i ligjit, Lagarde u shpreh pozitive, duke theksuar se kjo është e vlefshme “me kusht që Gjykata Supreme të respektohet dhe vendimet e saj të mbeten të paprekshme”.
“Nëse ky organ gjyqësor bie nën presion, atëherë unë jam shumë e shqetësuar për sundimin e ligjit”, përfundoi Lagarde.