Emisari i posaçëm i Bashkimit Evropian për dialogun Kosovë-Serbi, Miroslav Lajçak, në kuadër të Forumit të Delphit në Greqi, të premten e 28 prillit, ka thënë se nuk është koha për të hapur për qarkullim urën kryesore mbi lumin Ibër në Mitrovicë.
“Përderisa flasim, në Mitrovicë ka kërkesë për ta hapur urën dhe atmosfera dukshëm s’është e duhura për këtë. Dua ta shfrytëzoj këtë panel që të dërgoj mesazh se kjo është platforma e duhur (për dialogun). Ky plan është fitore e dyfishtë, ka shumë përfitime për të dyja palët dhe duhet të respektohen vijat e kuqe”, ka thënë Lajçaku, duke iu referuar Marrëveshjes së Brukselit dhe asaj të Ohrit.
Kuvendi Komunal në Mitrovicën veriore, të premten ka marrë vendim për hapjen e urës mbi lumin Ibër, për qarkullimin e automjeteve dhe lëvizjen e lirë të qytetarëve.
Ky vendim ka ardhur pas propozimit të delegates Aida Ferati-Doli, për hapjen e urës dhe qarkullimin e lirë të qytetarëve dhe automjeteve.