Përfaqësuesi special i Bashkimit Evropian, Miroslav Lajçak, është takuar me zëvendëskryeministrin e Maqedonisë së Veriut, për çështje evropiane, Bojan Marichikj.
Lajçak ka shprehur mirënjohjen ndaj përkrahjes së Maqedonisë së Veriut për dialog.
Në këtë takim është diskutuar për çështje thelbësore për të ardhmen evropiane të Maqedonisë së Veriut.
“Kisha takim të shkëlqyeshëm me zëvendëskryeministrin Marichikj. Jam mirënjohës ndaj Maqedonisë së Veriut për përkrahjen e saj të fuqishme ndaj dialogut, dhe mezi po pres takimit e ardhshëm për dialog në Ohër, në fund të këtij muaji. Ne po ashtu kemi diskutuar për çështje thelbësore për të ardhmen evropiane të Maqedonisë së Veriut”, ka shkruar Lajçak në Twitter.
Had an excellent meeting with DPM Marichikj. I am grateful to 🇲🇰 for its strong support to the Dialogue and am looking forward to the next Dialogue meeting in Ohrid later this month. We also discussed issues of essence to North Macedonia’s 🇪🇺 future. pic.twitter.com/zqxumS28Tw
— Miroslav Lajčák (@MiroslavLajcak) March 2, 2023
Në fund të takimit të 27 shkurtit në Bruksel, Bashkimi Evropian ka thënë se palët kanë shprehur gatishmëri për të vazhduar në zbatimin e planit të BE-së.
Takimi i radhës mes kryeministrit Kurti dhe presidentit serb, Aleksandar Vuçiq, pritet të mbahet gjatë këtij muaji.
Propozimi evropian u është dorëzuar palëve fillimisht në vjeshtën e vitit 2022.
Ky propozim parashihet t’i drejtojë palët drejt një marrëveshjeje gjithëpërfshirëse.
Propozim-marrëveshja që është bërë publike pas takimit, përfshin zotimin e palëve për t’i respektuar të gjitha marrëveshjet e arritura deri më tani në dialogun për normalizimin e marrëdhënieve, si dhe përkushtimin e tyre për të mos e penguar njëra-tjetrën në proceset integruese.
Marrëveshjet e deritashme përfshijnë edhe atë për themelimin e Asociacionit të Komunave me shumicë serbe në Kosovë, i cili është arritur në vitin 2013, por nuk është zbatuar kurrë.
Kurti thotë se në Kosovë nuk mund të ketë Asociacion njëetnik me kompetenca ekzekutive, ndërsa Vuçiq insiston në themelimin e tij.