Kryeministri i Kosovës, Albin Kurti, sot ( e martë ) do të presë në takim Përfaqësuesin e Posaçëm të Bashkimit Evropian për Dialogun Kosovë-Serbi, Miroslav Lajçak.

Takimi do të mbahet me fillim nga ora 09:00.

Ndërsa, Lajçak gjatë të hënës së 5 dhjetorit, ishte në Serbi, ku u takua me presidentin e Serbisë, Aleksandër Vuçiq.

“E theksova domosdoshmërinë e zbatimit të marrëveshjes për Asociacionin e komunave me shumicë serbe dhe respektimin e të drejtave dhe vullnetit të popullit tonë. Serbia është e vendosur të vazhdojë dialogun konstruktiv, me qëllim të ruajtjes së paqes dhe stabilitetit dhe kushteve më të mira, për jetën e të gjithëve qytetarëve”.

Kështu bëri të ditur, Vuçiq më 5 dhjetor, në profilin e tij në Instagram, pas takimit që pati me Lajçakun në Beograd.

Ndërkaq, sot  do të mbahet samiti i radhës midis BE-së dhe Ballkanit Perëndimor, ku vendi nikoqir do të jetë Tirana.

Ky samit do të jetë i pari midis Bashkimit Evropian dhe Ballkanit Perëndimor që zhvillohet në territorin e një vendi të rajonit që nuk është në BE.