Zëvendëskryeministri i Kosovës, Besnik Bislimi, këtë martë, do ta presë në takim përfaqësuesin Special të BE-së për dialogun Kosovë – Serbi, Miroslav Lajçak.
Siç ka bërë të ditur Qeveria e Kosovës, takimi pritet të zhvillohet nga ora 18:00 në objektin e qeverisë.
Kujtojmë se që nga muaji i kaluar nuk ka pasur asnjë takim mes Lajçak-ut dhe Bislimit në kuadër të dialogut.
Takimi i 15 majit ishte takimi i fundit dhe i shtatë në nivel të kryenegociatorëve për çështjen e dinarit serb, pasi në gjashtë takimet paraprake ata nuk arritën pajtim për ndonjë zgjidhje kompromisi.
Kryenegociatori i Kosovës, Bislimi, e kishte cilësuar si të dështuar takimin në Bruksel për dinarin, duke thënë se pala serbe erdhi me propozime të reja për çështjen, e jo me përgjigje.
Bislimi gjithashtu kishte deklaruar se nuk pret takime të tjera për këtë temë.
Por, Lajçak pas takimeve kishte shprehur gatishmërinë se pret takime tjera vetëm nëse palët janë të gatshme për zgjidhje.
Kosova dhe Serbia janë në negociata për më shumë se një dekadë, por shumë prej marrëveshjeve që kanë arritur, nuk i kanë zbatuar.
Nën Lajçakun, Kosova dhe Serbia më 2023 arritën Marrëveshjen drejt normalizimit të marrëdhënieve. Më vonë ajo u bë e njohur si Marrëveshja e Ohrit, por edhe ajo ka mbetur kryesisht e pazbatuar.
Lajçak është emëruar ambasador i BE-së në Zvicër, ku duhet të nisë mandatin më 1 shtator, blloku po mendon për ta gjetur pasardhësin e tij.