I dërguari i Bashkimit Evropian për dialogun Kosovë-Serbi, Miroslav Lajçak, pas takimit me presidentin e Serbisë, Aleksandër Vuçiq, ka njoftuar se me të ka biseduar për mundësinë e një zgjidhjeje politike që do të mundësonte uljen e tensioneve në veri të Kosovës si dhe largimin e barrikadave.
Lajçak, theksoi se Vuçiq, e kupton seriozitetin e situatës së krijuar.
“Vazhdova misionin tim sot në Beograd, ku u takova me presidentin Aleksandër Vuçiq. Ne patëm një diskutim të hapur dhe të ndershëm për një zgjidhje politike që do të ulte tensionet dhe do të mundësonte largimin e barrikadave. Ai e kupton seriozitetin e situatës”, ka shkruar Lajçak.
Lajçak, një ditë më parë ishte në vizitë edhe në Kosovë, ku u takua me kreun e ekzekutivit Albin Kurti, ku kishte theksuar nevojën e heqjes së barrikadave, por kjo sipas tij do duhej bërë përmes dialogut dhe jo forcës.
Ndërkohë edhe pas pesë ditëve, barrikadat e vendosura në veri të vendit nuk janë larguar.