Përfaqësuesi i posaçëm i Bashkimit Evropian në dialogun Kosovë-Serbi, Miroslav Lajçak, diskutimet me presidentin e Serbisë, Aleksandër Vuçiq, i ka cilësuar si të vështira.
Lajçak, ka njoftuar se presidentit serb i ka thënë se të gjitha marrëveshjet e arritura në Bruksel, në kuadër të dialogut Kosovë-Serbi, duhet të zbatohen.
Një marrëveshje të cilën Lajçak e ka përmendur është ajo për lirinë e lëvizjes të vitit 2011.
Emisari i BE-së, ka bërë të ditur se bisedimet do të vazhdojnë përsëri ditën e enjte.
“Patëm një diskutim të vështirë, por me përgjegjshmëri me Aleksander Vuçiq. I përcolla mesazhet dhe theksova se të gjitha marrëveshjet e Dialogut duhet të zbatohen, përfshirë edhe Marrëveshjen e vitit 2011 për Lirinë e Lëvizjes. Ne do të vazhdojmë bisedimet tona më vonë sonte”, ka shkruar Lajcak në Tëitter.
Zyrtarët e BE-së dhe SHBA-së, Miroslav Lajçak dhe Gabriel Escobar, të enjten kanë mbajtur takime me zyrtarët e lartë në Serbi.
Fillimisht ata u takuan me drejtorin e ashtuquajtur të Zyrës për Kosovën nga Qeveria e Serbisë, Peter Petkoviq.
Më pas Lajcak, u takua me presidentin e Serbisë, Aleksandër Vuçiq, teksa më vonë atyre i është bashkuar edhe emisari amerikan Gabriel Escobar.
Përfaqësuesi i posaçëm i Bashkimit Evropian në dialogun Kosovë-Serbi, Miroslav Lajçak, bashkë me të dërguarin e SHBA-së për Ballkanin Perëndimor, Gabriel Escobar, kishin qëndruar dy ditë në Kosovë ku ishin takuar me krerët e Qeverisë së Kosovës, presidenten, dhe partitë opozitare.
Qëllimi i vizitës, sipas emisarëve ishte që të shmangen tensionet në veri të Kosovës, dhe të normalizohen marrëdhëniet në mes të Kosovës dhe Serbisë.