Emisari special i Bashkimit Evropian për dialogun mes Kosovës dhe Serbisë, Miroslav Lajçak, ka thënë se po i ndjek nga afër zhvillimet në Kosovë pas vendimit Bankës Qendrore të Kosovës, me anë të të cilit ndalohet përdorimi i dinarit serb.
Kështu njoftoi ai përmes një postimi në llogarinë e tij në Facebook, teksa foli mbi takimet që pati javën e kaluar në Prishtinë e Beograd.
“Unë po ndjek gjithashtu nga afër zhvillimet në lidhje me Rregulloren e fundit të Bankës Qendrore të Kosovës për operacionet me para të gatshme, që veçanërisht ndikojnë te komunitetet serbe që jetojnë në Kosovë”, shkroi ai.
Teksa ka bërë një përmbledhje javore të aktivitetit të tij, Lajçak theksoi se me kryeministrin e Kosovës, Albin Kurti dhe precedentin serb, Aleksandër Vuçiq, “kishte biseda të thella” për procesin e dialogut dhe për gjendjen aktuale të marrëdhënieve BE-Kosovë”.
“Javën e kaluar nisa një udhëtim në Beograd dhe Prishtinë për të diskutuar gjendjen aktuale dhe hapat e ardhshëm në dialog me partnerët e mi. Duke filluar nga Beogradi, u takova me presidentin Aleksandër Vuçiq dhe kryenegociatorin Petar Petkoviq. Në vazhdim të udhëtimit tim në Kosovë, u takova me presidenten Vjosa Osmani për ta informuar për Dialogun, si dhe me kryeministrin Albin Kurti dhe zëvendëskryeministrin e parë dhe kryenegociatorin Besnik Bislimi”.