Emisari i BE-së për dialogun Kosovë-Serbi, Miroslav Lajçak, ka bërë të ditur se është takuar me zëvendëskryeministrin, Besnik Bislimi, në Bratislavë të Sllovakisë.
Lajçak, bëri me dije se me Bislimin kanë diskutuar rreth shtensionimit të situatës në veri të Kosovës, duke shtuar se kanë rënë dakord për hapat e parë drejtë këtij qëllimi dhe zbatimi të të gjitha marrëveshjeve të dialogut.
“Patëm një diskutim bilateral intensiv sot në Bratislavë me Zëvendëskryemiministrin Besnik Bislimi për shtensionimin e situatës në veri të Kosovës, sipas deklaratës së 3 qershorit nga Bashkimi Evropian dhe për rrugën e zbatimit të të gjitha marrëveshjeve të Dialogut. U pajtuam për hapat e parë drejt këtij qëllimi”, ka shkruar Lajcak në Twitter.
Këtë e ka bërë të ditur edhe vetë, Bislimi, duke shtuar se kanë rënë dakord për hapat e nevojshëm për deeskalimin e situatës në verië
“U takova me emisarin e BE-së Miroslav Lajcak për të diskutuar hapat e ardhshëm për zbatimin e plotë dhe të drejtë të Marrëveshjes Bazë dhe Aneksit të saj. Ramë dakord për hapat e nevojshëm për të siguruar uljen e përshkallëzimit efektiv dhe të përcaktuar me ligj, fokusimin në normalizimin dhe zbatimin e sundimit të ligjit”, ka shkruar Bislimi në Twitter.