Sokol Halili, i dyshuar për vrasjen e gruas shtatzënë, e ka vrarë veten. Kështu ka bërë të ditur ministri i Punëve të Brendshme, Xhelal Sveçla.
Ai ka thënë se përkundër tentativës së zyrtarëve policorë për të negociuar që të dorëzohet, i dyshuari për vrasjen e gruas së tij, e ka vrarë veten.
“Pas një pune intenzive të të gjitha njësiteve tē Policise së Kosovës ,është arritur që të lokalizohet vendndodhja e vrasësit Sokol Halili. Përkundër tentativës së zyrtarëve policorë që të negociojnë dorëzimin, dorasi vret veten. Policia e Kosovës si dhe Inspektoriati Policor i Kosovës do t’i vazhdojnë hetimet për zbulimin e gjitha rrethanave të vrasjes së gruas shtatzënë dhe vetëvrasjes së dorasit”, ka thënë Xhelal Sveçla.
Halili ishte që nga e mërkura në arrati, pasi e kishte vrarë bashkëshorten e tij, e cila ishte shtatzënë. Krimin, ai e kishte kryer ne oborrin e QKUK-së, pranë Gjinekologjisë.
Familjarët e gruas së vrarë kishin dhënë detaje se vrasësi në të kaluarën kishte ushtruar dhunë fizike ndaj gruas së tij.
Gruaja e cila u vra nga burri i saj, para se të vritej kishte urdhërmbrojtje nga Gjykata Themelore e Ferizajt.
Ajo u varros sot në fshatin Llugagji të Lipjanit.