Chelsea FC ka konfirmuar se drejtoresha, Marina Granovskaia, do të largohet nga roli i saj si drejtore sportive këtë verë, riparimi i madh në klub vazhdon pas njoftimit se po ashtu kryetari i klubit, Bruce Buck, do të largohet.
Bashkëpronari i ri Todd Boehly zëvendëson Buck pas blerjes së klubit nga Roman Abramovich, me amerikanin që tani merr drejtimin në negociatat edhe në tregun e transferimeve si drejtor i përkohshëm sportiv.
Boehly mësohet të ketë qenë kyç në negociatat për rikthimin e Romelu Lukakut në Inter Milan në formë huazimi.
Tashmë pronari i ri bashkëkontrollues është konfirmuar si kryetari i ri i klubit të Stamford Bridge, duke zëvendësuar Buck.
Granovskaia kishte “vepruar si përfaqësuese e pronarit në klub dhe në mbështetje të bordit të drejtorëve”, që nga viti 2010 dhe u emërua në bord në vitin 2013 kur mori përgjegjësinë për negociatat e transferimit dhe kontratës.
“Falënderojmë Marinën për shërbimin e saj shumëvjeçar të shkëlqyer për Klubin dhe i urojmë të gjitha më të mirat në sipërmarrjet e saj të ardhshme”, ka thënë Boehly pas njoftimit.
Lajmi vjen pasi të gjithë figurat kryesore të konsorciumit Boehly-Clearlake Capital janë shtuar në bordin e ri të Chelsea-t, teksa epoka e re e klubit nga Londra perëndimore vazhdon të rritet.
“Si kujdestarë të Chelsea FC, ne tani fillojmë të ekzekutojmë vizionin dhe planin tonë afatgjatë për klubin, duke krijuar një përvojë të jashtëzakonshme për tifozët e tij pasionantë, besnikë dhe duke vazhduar të sfidojmë për nderimet kryesore në përputhje me historinë e përkushtuar të Chelsea FC,” ka thënë Boehly, raporton Portali D.
Chelsea Football Club has today announced a series of appointments to its Board of Directors and other leadership changes. ⤵️
— Chelsea FC (@ChelseaFC) June 22, 2022
Anëtarët e tjerë të bordit të konfirmuar të Chelsea FC përfshijnë:
Behdad Eghbali dhe José E. Feliciano, bashkë-pronarët kontrollues të Chelsea FC, dhe bashkëthemeluesit dhe partnerët menaxhues të Clearlake Capital
Mark Walter, bashkëpronar i Chelsea FC, bashkëthemelues dhe CEO i Guggenheim Partners, pronar i Los Angeles Dodgers, Los Angeles Lakers dhe Los Angeles Sparks
Hansjörg Wyss, bashkëpronar i Chelsea FC, themelues i Fondacionit Wyss
Jonathan Goldstein, bashkëpronar i Chelsea FC, bashkëthemelues dhe CEO i Cain International
Barbara Charone, drejtor dhe bashkëthemelues i MBC PR
Lord Daniel Finkelstein OBE, kolumnist dhe ish-redaktor ekzekutiv i The Times
James Pade, partner dhe drejtor menaxhues i Clearlake Capital