Heqja e sanksioneve të vendosura ndaj Rusisë, është pjesë e negociatave për paqe ndërmjet Moskës dhe Ukrainës, negociata të cilat janë të vështira, po vazhdojnë çdo ditë, ka thënë Ministri i Jashtëm rus Sergei Lavrov të shtunën, raporton Reuters.
Kievi paralajmëroi të premten paralajmëroi se bisedimet për t’i dhënë fund pushtimit rus, tashmë në muajin e tretë, janë në rrezik të kolapsojnë.
“Aktualisht, delegacionet ruse dhe ukrainase po diskutojnë çdo ditë përmes video-konferencave për një traktat të mundshëm në mes të dy vendeve”, tha Lavrov për agjencinë zyrtare të lajmeve të Kinës Xinhua të publikuar në faqen e internetit të Ministrisë së Jashtme ruse.
Presidenti i Ukrainës, Volodymyr Zelenskiy, ka këmbëngulur që nga fillimi i pushtimit të Ukrainës nga Rusia më 24 shkurt se sanksionet perëndimore ndaj Rusisë duhet të forcohen dhe nuk mund të jenë pjesë e negociatave.
Ukraina dhe Rusia nuk kanë mbajtur bisedime ballë për ballë për të siguruar paqe që nga 29 marsi, atmosfera është acaruar mbi akuzat e Ukrainës se trupat ruse kryen masakra ndaj civilëve derisa u tërhoqën nga zonat afër Kievit. Ndërkaq, Moska i ka mohuar këto pretendime.
Veprimet e saj në Ukrainë Moska i quan një “operacion special” për të demilitarizuar dhe “denazifikuar” fqinjin e saj. Ukraina dhe Perëndimi thonë se Rusia nisi një luftë të paprovokuar ndaj Ukrainës.
“Axhenda e bisedimeve përfshin gjithashtu, ndër të tjera, çështjet e denazifikimit, njohjen e realiteteve të reja gjeopolitike, heqjen e sanksioneve, statusin e gjuhës ruse”, tha Lavrov, pa dhënë shumë detaje.
“Ne jemi për vazhdimin e negociatave, edhe pse ato janë të vështira”, tha Lavrov.
Aleatët perëndimorë të Ukrainës kanë vendosur sanksione gjithëpërfshirëse ndaj Moskës. Ata kanë ngrirë rreth gjysmën e rezervave shtetërore të arit dhe valutës së huaj të Rusisë, duke goditur ekonominë e Rusisë dhe duke e vendosur atë në prag të falimentimit.