Deputeti i Lidhjes Demokratike të Kosovës, Arben Gashi, ka njoftuar se ai të premten në emër të Grupit Parlamentar të Lidhjes Demokratike të Kosovës (LDK), ka dorëzuar nismën për shkarkimin e bordit të Zyrës së Rregullatorit të Energjisë (ZRrE).
Këtë njoftim, Gashi e ka bërë të ditur përmes një postimi në rrjetin social Facebook, ku ka shtuar se vendimet e bordit të ZRRE-së kanë qenë jo transparente dhe diskriminuese ndaj konsumatorëve.
Po ashtu, sipas tij, papërgjegjësia e bordit të ZRrE-së ka dëmtuar rëndë mirëqenien e qytetarëve.
“Vendimet e bordit të ZRRE-së kanë qenë jo transparente, diskriminuese ndaj konsumatorëve si dhe kundër interesit publik. Paaftësia në menaxhimin e krizës së energjisë dhe papërgjegjësia e bordit të ZRRE-së ka dëmtuar rënd mirëqenien e qytetarëve duke e thelluar krizën e papërballueshmerisë, andaj shkarkimi i këtij bordi është më e pakta”, ka deklaruar Gashi, trasnmeton Portali D.
Përveç, LDK-së, shkarkimin e bordit të ZRrE-së e kanë kërkuar edhe deputetët e Partisë Demokratike të Kosovës (PDK).
Ndërkaq, Gjykata e Apelit kishte vendosur pas ankesës së ZRRE-së, duke thënë se ishte e pabazuar.
Gjykata Themelore në Prishtinë më 9 prill kishte marrë vendimin për pezullimin e vendimit të ZRRE-së për shtrenjtimin e rrymës, por pavarësisht kësaj, qytetarët e Kosovës edhe në muajin prill janë faturuar me çmime të rritura.
Procesi në gjykatë për të pezulluar vendimin për shtrenjtimin e rrymës ka nisur pas padisë së ngritur nga Partia Demokratike e Kosovës, me arsyetimin se shtrenjtimi i rrymës “i dëmton qytetarët”.