Shefi i Grupit Parlamentar i Lidhjes Demokratike të Kosovës, Arben Gashi, ka paraqitur para deputetëve propozimin për formimin e komisionit hetimor parlamentar lidhur me procedurat për furnizimin dhe menaxhimin me rezervat shtetërore, si dhe keqpërdorimet dhe abuzimet e mundshme me rezervat shtetërore, nëpërmjet kualifikimit të procedurës si sekret shtetëror për furnizime të tilla.
Në seancën e Kuvendit të Kosovës, Gashi propozoi formimin e këtij komisioni në emër të 41 nënshkruesve.
Duke pasur parasysh indicet përtej dyshimit të bazuar për abuzime të mundshme të ndërlidhura me procesin e furnizimit me rezerva shtetërore, e konsiderojmë të nevojshme që të bëhet hetim i thelluar parlamentar”, tha Gashi.
Ai konsideron se është e domosdoshme që të ketë hetim parlamentar për të parë nga afër sa janë respektuar ligjet dhe procedurat për çështjen e rezervave shtetërore.
“Cila është procedura që është ndjekur në tërësinë e procesit? A janë hapur tenderë për furnizime shtetërore? Çka është kualifikuar si sekret shtetëror, produkti, çmimi, vendodhja, personat e përfshirë, kontratat si dhe a ka pasur certifikatë sigurie për personat e përfshirë, kush dhe si e ka menaxhuar këtë proces deri në fund, cilët kanë qenë akterët politikë që e kanë drejtuar këtë proces, cila mund të jetë afërsia eventuale e përfituesve të këtyre kontratave me kryeministrin apo me nivelet e tjera politike…?”, pyeti ai.