Lidhja Demokratike e Kosovës (LDK) ka njoftuar se kryetari i partisë ka marrë vendim për thirrjen e Kuvendit të Jashtëzakonshëm të LDK-së, pas përfundimit të procedurave statutare për verifikimin e kërkesës së paraqitur nga delegatët e Kuvendit.
Sipas njoftimit zyrtar, Sekretariati i Përgjithshëm i LDK-së ka verifikuar të gjitha nënshkrimet e dorëzuara dhe ka konstatuar se është plotësuar kriteri statutar prej të paktën një të tretës (1/3) të delegatëve, i nevojshëm për thirrjen e Kuvendit të Jashtëzakonshëm.
Në bazë të këtij verifikimi, kryetari i LDK-së ka vendosur që Kuvendi i Jashtëzakonshëm të mbahet të enjten, më 30 korrik 2026, duke filluar nga ora 18:00.
LDK-ja ka bërë të ditur se vendi i mbajtjes së Kuvendit dhe detajet e tjera organizative do t’u komunikohen delegatëve në përputhje me procedurat statutare.
Në fund të njoftimit, partia thekson se procesi do të zhvillohet në përputhje të plotë me Statutin e LDK-së, parimet demokratike, transparencën institucionale dhe respektimin e vullnetit të delegatëve të Kuvendit.