Lidhja Demokratike e Kosovës (LDK) ka kërkuar dorëheqjen e ministres së Arsimit, Shkencës, Teknologjisë dhe Inovacionit, Arbërie Nagavcit, pasi kjo e fundit u konfirmua se ka bërë shkeje kushtetuese kur kishte ndërhyrë në kompetenca të nivlit lokal në komunën e Kamenicës.
Nagavci kishte ndërhyrë në reformën për arsim që kishte ndërmarr kryetari i Kamenicës, Qëndron Kastrati. Kjo ndërhyerje është cilësuar si shkelje e Kushtetutës.
“Qytetarët duhet të mbrojnë Kushtetutën, veçanërisht kur Kushtetuta shkelet nga pushteti. Kosova ka ndërtuar një standart demokratik të respektimit të Kushtetutës dhe të vendimeve të Gjykatës Kushtetuese më të mirë në rajon. Ne si subjekt e kemi dhënë shembullin e respektimit të vendimeve të Gjykatës Kushtetuese në secilin rast”, ka deklaruar Xhafer Tahiri, Zyrtari i LDK-së.
Tahiri vazhdoi më tej duke përmendur edhe shkeljen e Kushtetutës, dy herë nga ana e qeverisë.
“Qeveria Kurti në këtë vit ka arritur që të shkelë disa herë Kushtetutën e Kosovës, të vërtetuar me aktgjykime të plotfuqishme të Gjykatës Kushtetuese. Rasti i parë ishte për Këshillin e Pavarur të Shërbimit Civil të Kosovës”, ka thënë Tahiri duke cilësuar rastin e Nagavcit si më të freskëtin të kësaj natyre.
Zyrtarja e LDK-së, Jehona Lushaku thotë që është më se e qartë që Qeveria ka keqpërdorur arsimin për fitime elektorale.
“Ju kujtojmë që ky vendim është marrë pikërisht në kohë fushate gjatë zgjedhjeve të kaluara”, ka vazhduar ajo.
Lushaku thotë që një ministre e tillë nuk është shembulli më i mirë për arsim.
“Kjo ministre nuk mund ta udhëheq arsimin ku edukohen gjeneratat e ardhshme. Ajo nuk është shembulli më i mirë. Arsimi duhet të udhëhiqet nga njerëz me kredibilitet dhe që kanë përgjegjësi. Andaj, LDK kërkon dorëheqjen e menjëhershme të ministres Nagavci”, ka thënë Lushaku.
Kujtojmë që Arbërie Nagavci u emërua si ministre e Arsimit, Shkencës, Teknologjisë dhe Inovacionit vitin e kaluar.