Lidhja Demokratike e Kosovës (LDK) ka kërkuar shkarkimin e ministres së Drejtësisë, Albulena Haxhiut.
Deputetja e LDK-së, Doarsa Kica- Xhelili, të shtunën në një konferencë për media, ka thënë se me deklaratën e Haxhiut ndaj prokurorit se duhet të dorëzohej, ajo ka kërcënuar profesionistët në sistemin e drejtësisë.
“Dje, ministrja e Drejtësisë në seancën gjyqësore ku ka aktakuzë të ngritur kudër saj, i kërkoi prokurorit të dorëzohej. Dorëzohu i tha, sa nuk është shumë vonë. Nuk tha kërkoj drejtësi, në vend të shumë mundësive që kishte për t’u shprehur, zgjodhi t’i thoshte prokurorit dorëzohu. Ajo ka dëshmuar disa herë se nuk ka aftësi ta zhveshë petkun personal e as atë të të akuzuarës kur hyn në Ministri e Kuvend. Harron që është institucion. Fyen, kërcënon, intimidon. Dhe jo vetëm ajo, ajo e të tjerët”, ka thënë ajo.
Ndërsa, ka theksuar se Qeveria po bën të kundërtën e asaj që kishte premtuar për ndryshim. Kica- Xhelili ka shtuar se Haxhiu duhet të dorëhiqet vetë apo të shkarkohet.
Por, sipas saj, thirrjet për shkarkim “po hasin në vesh të shurdhër”.
“Është premtuar ndryshim, pavarësi për sistemin e drejtësi, ministra pa aktakuzë. Realiteti po na dëshmon të kundërtën. Përveç që pagat e gjyqtarëve e prokurorëve janë ulur, po punohet për dorëzim të drejtësisë. Një ministre e Drejtësisë që i kërkon drejtësisë dorëzim, duhet të dorëzohet vetë ose të shkarkohet”, ka vijuar ajo.
Ndër të tjera, Kica-Xhelili ka shprehur mbështetje nga ana e LDK-së për prokurorët, ndërsa u ka bërë thirrje që të mos dorëzohen karshi kërcënimeve.
“Kosova ka nevojë për prokurorë që nuk dorëzohen, posaçërisht kur kërcënohen nga njerëz të pushtetit, qofshin Elez, qofshin Lumez, prokurorët nuk e kanë kërcënimin për herë të parë”, ka thënë ajo.