Lidhja Demokratike e Kosovës ka pranuar me shqetësim raportin e fundit të Departamentit amerikan të shtetit, për Kosovën për vitin 2023, i cili, sipas kësaj partie opozitare, i dha vulë “paaftësisë së Qeverisë dhe korrupsionit”.
Me anë të një komunikate për medie, LDK-ja e ka ftuar Prokurorinë e Kosovës që të trajtojë të gjitha shqetësimet e ngritura deri më sot.
“LDK, në vazhdimësi ka tërhequr vëmendjen dhe ka denoncuar publikisht dyshimet për korrupsion nga Qeveria, duke përfshirë edhe qindra tenderë sekretë që kjo qeveri ka nënshkruar, në vlerë prej mbi 240 milionë euro. Pra ka propagandë dhe nuk ka luftë kundër korrupsionit siç pretendon Qeveria e Kosovës, gjë të cilën e vërtetoi dhe raporti DASH-it. Lidhja Demokratike e Kosovës, fton Prokurorinë e Kosovës që të trajtojë të gjitha shqetësimet e ngritura deri më sot. Kërkojmë që prokuroria të zbatojë ligjin pa asnjë pengesë dhe të hetojë me seriozitet të gjitha dyshimet për korrupsion dhe papërgjegjshmëri qeveritare”, thuhet në reagim.
Në komunikatë theksohet se LDK-ja është e përkushtuar të vazhdojë të ngrejë zërin në mbrojtje të institucioneve nga korrupsioni, që, sipas tyre, ka instaluar kjo Qeveri.
“LDK po ashtu do të shfrytëzojë të gjithë mekanizmat institucional që përgjegjësit për veprat e tyre të jenë para ligjit. Kosova meriton një qeverisje të pastër dhe të drejtë për të gjithë qytetarët e saj, dhe ne jemi të vendosur të punojmë drejt këtij qëllimi”, vijon njoftimi.