Lidhja Demokratike e Kosovës (LDK), duke iu referuar Agjencisë së Statistikave të Kosovës, ka thënë se çmimet që nga marrja e mandatit të kësaj qeverie janë ngritur 25 për qind.
Në një komunikatë për media, LDK-ja ka akuzuar qeverinë se “po gënjen” kur thotë se po kujdeset për mirëqenien e qytetarëve.
“Në 3 vitet e fundit, sipas Agjencisë së Statistikave të Kosovës çmimet në Kosovë, janë rritur përplot 25%. Kjo përqindje enorme bën që të jetë rritja më e madhe e çmimeve në historinë e Kosovës. Pra, ky fakt dëshmon se Qeveria nuk është kujdesur për mirëqenien e qytetarëve, siç kanë potencuar se kanë bërë një gjë të tillë, sepse të dhënat zyrtare e hedhin poshtë propagandën e tyre”, thuhet në njoftimin e LDK-së.
Sipas LDK-së, ngritja enorme e çmimeve është më e larta ndonjëherë në historinë e Kosovës.
“A e dini se sa janë rritur produktet bazike, gjatë këtyre 3 viteve? – 42%. Do të thotë, çmimet e ushqimeve që na duhen çdo ditë në tryezën tonë siç janë: buka, mielli, vaji, kripa, sheqeri, qumështi e vezët janë rritur përplot 42%, që nga koha e marrjes së mandatit të kësaj qeverie. Përveç kësaj, rritje të produkteve bazike, qytetari i Kosovës gjatë tre viteve të fundit me qeverisjen aktuale, është varfëruar për një të katërtën e pasurisë së poseduar. Qeveria ka kontribuuar që jeta e qytetarit të vështirësohet e varfërohet, andaj edhe është përgjegjëse për varfërinë”, thuhet tutje.
LDK-ja ka theksuar tutje se qeveria po propagandon edhe për inflacion.
“Pushteti, me propagandën e tyre të vazhdueshme në thuajse çdo fushë, ka folur edhe për inflacionin rrejshëm. Por, faktet tregojnë qartazi se Kosova ka inflacion enorm. Fshehja e rritjes së inflacionit, tregon se Qeveria ka përdorur rritjen e numrave buxhetor dje qarkullimin biznesor si sukses. Por, propaganda nuk pranohet lehtë nga kushdo. Faktet, hedhin poshtë tendencën për të manipuluar dhe shfaqin të vërtetën e varfërisë së qytetarit dhe rritjen e çmimeve në produktet bazike”.